رفعت” مروة” دعوى إثبات نسب أمام محكمة الأسرة، في واقعة غريبة أثارت دهشة الحضور، حيث روت تفاصيل قصتها التي بدأت بزواج لم يستمر سوى 5 أيام، وفوجئت بهروب زوجى.
قالت ” مروة” أمام هيئة المحكمة: اتعرفت عليه عن طريق واحدة صاحبتي، كان دايمًا بيقول إنه اتظلم في زواجه الأول، وإنه بيدوّر على ست تصونه وتفهمه، عرض عليا الزواج، وافقت على الجواز العرفي بعد ما وعدني إنه هيكتب كتابنا رسمي بعد كام شهر، أول ما أموره المادية تتحسن، أنا صدقته، لأني حبيته، وحسيت إنه راجل مسؤول، خاصة إنه كان بيظهر إنه بيحبني ومهتم بيا.
أكملت ” مروة” : أنا اتجوزت، بورقة عرفي، وشاهدين، وكل حاجة تمت في حضور الشهود وبعد الجواز بـ5 أيام، صحي من النوم، قال لي نازل أشوف شغل ومرجعش تاني، حاولت أتواصل معاه، تليفونه مقفول، وروحت لأسرته قالولي مايعرفوش عنه حاجة، ورفضوا يعترفوا بالجواز،لما عرفت إني حامل، حسيت إن الدنيا وقعت على دماغي، طفلي مالوش ذنب، مش عايزة نفقة ولا شقة، أنا بس عايزة اسمه يتكتب في شهادة ميلاده .
وكشفت أنها قدّمت للمحكمة عقد الزواج العرفي، ورسائل بينهما تثبت علاقتهما، بالإضافة إلى صور شخصية لهما معًا، وطالبت بإجراء تحليل لإثبات النسب.
